Main Nashe Me Hoon...

/*Characters
Devdas as D.D
Chunni Babu as Chunnu */

D.D.: Arey!!! Chunnu ye aap hume kahan le aaye?

Chunnu: D.D. Babu ,ye shehar ka sabse bada bar hai.

D.D.: Chunnu bhai isse to achcha to aap hume Chandramukhi ki yahan le chalte, wo kam se kam udhar to deti hai. Yahan to credit card bhi nahi lete, aur aajkal to bahut kadki chal rahi hai.

Chunnu: Koi baat nahi D.D. Babu!! hum hain na. Aaj ki sham humari taraf se. To bataiye kya peejiyega?

D.D.: Waise to kuch bhi chalega, magar apna lebel to Green Lebel.

After some time….

Chunnu: Kya D.D. Babu aap to peene me hi mashgul ho gaye. Ye bhi bhool gaye ki hum bhi baithe hain aapke saath. Kuch baat to kijiye?

D.D.: Maaf karna Chunnu, magar hume peene do hum hosh me nahi rehna chahte?

Chunnu: Bas D.D. babu!!! Ab bas karo. Aur mat peeyo.

D.D.: Nahi Chunnu hume mat roko. Jab tak hum hosh me rahenge Paaro ki yaad hume aati rahegi aur hum tadapte rahenge. Aur is tadap se to behoshi ki neend hi achchci hai, jisme kam se kam dard to nahi hota.

Chunnu: D.D. Babu, kya aapki Paaro bhi aapko itna hi chahti hai?

D.D.: Ye to hum nahi jaante Chunnu, Paaro ke paas to diya hai jise jala kar wo apna man behla leti hai magar humare paas… humare paas to bas ye dil hai jalane ko.

Chunnu: D.D. Babu, aakhir aapki Paro aapse door kyun ho gai? Aur aapki ye haalat kaise ho gai?

D.D.: Bas yahi to hum bhi jaan na chahte hain ki aakhir humse aisi kya bhool ho gayi ki wo hume chod kar chali gai? Kis galti ki hume itni badi saza mili? Wo to kehti thi ki use bhi humari utni hi jarurat hain jitni ki hume uski hai. Usne to vaada kiya tha ki kabhi hume chod kar nahi jayegi. Magar aaj to unhone hume itna akela kar diya ki aaj humara saaya bhi humre saath nahi hai .
Aur rahi humari halat ki baat to iske zimmedar aap jaise dost hain. Jinke paas hum apna tuta dil leke aaye the aur unhone hume daru ke theke pe bitha diya. Aap jaise dost ho to dushmano ki kya jarurat hai?

Chunnu: D.D. Babu!! lagta hai aapko chadh gai hai. Hum to aapka bhala chahne wale hain.

D.D.: Arey!!! Yadi humara bhala chahne wale hote to hume is tarah daaru pilaane ki bajai humari problem solve karte?

Chunnu: D.D. Babu, aap Paro ko bhool kyun nahi jaate?

D.D.: Nahi Chunnu nahi!!! Hum sapne me bhi aisa nahi soch sakte. Hum ek baar saans lena bhool sakte hain magar Paaro ko nahi bhula sakte.

Chunnu: D.D. Babu aap Paro ko bahut pyar karte hain na?

D.D.: Chunnu hum ye to nahi jaante ki hum paaro ko kitna pyar karte hain, magar unki judaai humse bardasht nahi hoti.

Chunnu: Wah!!!! D.D. Babu, humne bahut se aashiqo ko dekha magar aap to sabse alag hain. Jisko Paro ka dard itna hai, uske naam ka nasha itna hai ki wo kabse sode ko daaru samjh kar piye ja raha hai aur use nasa bhi ho raha hai. Main to kab se keh raha hun ruk jao aur mat piyo. Abhi humara order nahi aaya hai.